Balade 546 : Guynes, Hames, Merc, Sangattes, Clays (DCCCLXXXIII)

Autre Balade

                        Guynes, Hames, Merc, Sangattes, Clays,
                        Oye et Puille, qui nous faittes frontiere,
                        Finerons nous de guerroier jamais ?                                                 228c
                        Tout est destruit en plain et en costiere.
5                      Querir nous fault noz vivres trop arriere.
                                    Bien nous entrecongnoissons,
                        De jour en jour toudis apovrissons.
                        L’en gaingne po vers Baneling[ue]hem
                        […][1]
10                    D’acort commun a Rodeling[ue]hem.

                        Ly plat pais ars, gastéz et deffais,
                        Tristes, dolens, perdroit en tel maniere.
                        Ardre huchoit en disant : ― Faictes paix !
                        Le Montore, le Planque, amie chiere,
15                    Estremboque, Audruic qui est fiere,
                                    Le Virelart requerons
                        Alambon, Lique, Fyennes, supplions.
                        Tout est perdu vers Barbeling[ue]hem.
                        Pour ce vous lo que nous nous acordons
20                    D’acort commun a Rodeling[ue]hem.

                        Ne guerrions[2] le pais desormais :
                        Tant est desert qu’il n’y a que bruiere,
                        De nous nourrir ne puet porter le fais.
                        Querons ailleurs guerre qui nous afiere,
25                    Sur Sarrazins levons nostre banniere
                                    Encontre yceuls nous croisons,
                        Et ce pais a repeupler laissons
                        Aux bonnes gens d’environ Tournehem.
                        Se l’en m’en croit, la guerre finerons
30                    D’acort commun a Rodeling[ue]hem.

[1] Vers manquant

[2] Ms. g. plus