Balade 545 : Galois, Galois, vous vous estes prins (DCCCLXXXII)

Balade

                        Galois, Galois, vous vous estes partis[1]                                              228b
                        Soudainement pour querir aventure,
                        Sanz dire adieu a moy n’a vos[2] amis,
                        Car vous n’avéz de compaignie cure,
5                      En Sorelois sera vostre pasture.
                        Or vous gardéz d’Artus et des barons,
                        Car ilz sont fors, mais se la guerre dure,
                        Ramenéz [moy] deux couples de Bretons.

                        Je, Tremoille, suis encor a Paris
10                    Qui, Dieu merci, de mon argent me cure.
                        Si font autres qui s’i tiennent envis,
                        Qui n’ont denier, ne chevau, ne sainture,
                        Que tout ne soit mis a desconfiture :
                        A noz hostelz trop male guerre avons.
15                    Pour acquitter nostre despense dure,
                        Ramenéz moy .ii. couples de Gascons[3].

                        Reconfortéz les povres esbahis,
                        Le faire ainsi est courtoise nature.
                        Et se jamais vous voy en no pais,
20                    Je vous donrray de nostre nourreture :
                        C’est .ii. barilz de la belle eaue[4] pure
                        Dont vous pourréz bien moiller voz grenons.
                        Soiéz vaillans et ouvréz par mesure :
                        Ramenéz moy deux couples de Bretons.

[1] Ms. prins

[2] Ms. vostres

[3] Saint Hilaire corrige en Bretons

[4] Ms. beaune