Balade 544 : Tant fu d’amours sousprins et tourmentéz (DCCCLXXXI)

Autre Balade d’amour fosennee

                        Tant fu d’amours sousprins et tourmentéz
                        Que Dieu regny et le diable a seigneur
                        Adveue aussi, se jamais jeue[1] aux dez                                              228a
                        Ne se femme touche[2] par deshoneur
5                      De demi an, tant ai fresche couleur,
                        Ne tant soit or belle, jeune et[3] jolie :
                        Je l’ay juré, ne m’en parjurray mie.

                        Aucuns cuident que j’aie esté trompéz :
                        Certes non ay, je le faiz par honneur.
10                    Homs gracieus ne doit estre assotéz
                        De tel pechié dont vient trop de doleur.
                        L’en se parjure aux dez, dont c’est horreur,
                        Pour ce jamais n’y jourray en ma vie :
                        Je l’ay juré, ne m’en parjurray mie.

15                    Je me repens de ces deux maulx passéz.
                        Mais de mon veu m’est ja[4] venu le plour,
                        Car je seray souventefoiz temptéz
                        Quant je verray la precieuse flour.
                        Ce demi an me fera trop d’orreur,
20                    Mes oeulx clorray pour couvrir ma folie :
                        Je l’ay juré, ne m’en parjurray mie.

                        L’envoy

                        Douce Venus, qui toute amour sentéz,
                        Avecques moy de ce veu dispenséz :
                        Ma jonesse me doit estre merie.
25                    Et deux tortiz vous seront presentéz
                        Par moy qui suis d’amours destalentéz :
                        Je l’ay juré, ne m’en parjurray mie.

[1] Saint Hilaire corrige en joue

[2] Ms. couche

[3] Ms. ne

[4] Ms. desja