Balade 543 : Que diriéz vous du froit mois de Janvier (DCCCLXXX)

Autre Balade

                        Que diriéz vous du froit mois de Janvier
                        S’il se vouloit marier a avril
                        Qui fait les fleurs et printemps verdoier,
                        Arbres et prez, et chanter soubz le bril
5                                  Le tresplaisant rossignol ?
                        Et janvier a tousjours le froit au col,                                                 227d
                        Son arbre sec et au nés la rupie,
                        Le chief de noif et peléz com saint Pol :
                        Est il saiges qui ainsi se marie ?

10                    Ainsi fait hom[1] qui se veut marier
                        De .lx. ans a jeune corps gentil,
                        Qui a .x. ans veult son [bien] essaier,
                        Et mettre ainsi le vert o le gresil.
                                    Il fait trop estrange vol,
15                    Car prés du laz le fault chanter en sol,
                        Qui viellement en jeune art sol[e]fie
                        Asséz de gens le tiennent pour [un] fol :
                        Est il saiges qui ainsi se marie ?

                        Vieulx homs ne fait que merencolier,
20                    Jeune femme a entendement subtil.
                        Il veult dormir et elle veult veillier
                        Et veult aller aux roses ou courtil.
                                    Elle est fresche et il est mol.
                        S’il veut des pois, on lui donra du chol.
25                    Lors chiet vieulx homs en grant merancolie.
                        Dire puet [bien] « A moy sepulcre vol. »
                        Est il saiges qui ainsi se marie ?

[1] Ms. homme