Balade 542 : N’aléz aux champs, tenéz vous a la ville (DCCCLXXIX)

Autre Balade sur les mandemens faiz pour la guerre de France

                        N’aléz aux champs, tenéz vous a la ville,
                        Se vous veéz que le temps soit frileux.
                        Ou temps d’iver qu’il neige ou [qu’il] gresille,
                        Les mandemens que l’en fait sont doubteux.
5                      Qui s’arme lors il en devient gouteux,                                               227c
                        Car mauvais fait chevaucher sur [la] glace.
                        Se jambe ront il devendra boiteux :
                        Excuséz vous par le conseil d’Eustace.

                        Il a trop froit qui a tel billart bille,
10                    Encouruz est, chetis et rupieux,
                        Et a les doiz roides comme cheville,
                        Rume le prant et puis devient tousseux.
                        Mais leurs chevaulx n’ont pas le cul pailleux,
                        Qui sanz estrain logent en froide place.
15                    S’en vous mande, ne soiéz pas honteux,
                        Escuséz vous par le conseil d’Eustace.

                        Parléz a droit, aiéz langaige[1] habille,
                        Morfonduz sont vos chevaulx et morveux[2]
                        Et vos harnois ne vault unelentille.
20                    Varlet n’avéz et pas n’iréz tous seulx,
                        Et si estes du chief trop dolereux.
                        Autre queréz qui ceste rese face,
                        Car quant a moy je [vous] conseille et leux
                        Excuséz vous par le conseil d’Eustace.

[1] Ms. le langaige

[2] Ms. mortveux