Balade 541 : J’ay moult d’avis pour mon fait avancer (DCCCLXXVIII)

Autre Balade sur foul cuidier

                        J’ay moult d’avis pour mon fait avancer,
                        Mais moy ne autres[1] ne s’en puet percevoir,
                        Car des long temps m’a deçut Foul Cuider                                       227b
                        Qui ne m’a fait aucun bien recevoir,
5                      Et si ay je toudis fait mon devoir,
                        Mais je vail po ou l’en ne congnoist pas :
                        Pour ce me fault souvent ramentevoir,
                        Et se je fail je doy bien dire « Helas ! »

                        Pluseurs dient de leur bien qu’ilz m’ont chier
10                    Et que je suis asséz dignes d’avoir
                        Aucun estat. Si les doy mercier,
                        Consideré qu’en moy a pou sçavoir.
                        Mais loiaulté trouveront ilz pour voir
                        En mon po sens toudis et en tous cas.
15                    Jusques a ci ay en eulx mon espoir
                        Et se je fail je doy bien dire « Helas ! »

                        Car sui honteus, doubtant d’eulx trop chargier.
                        Si leur suppli de ma personne avoir
                        En memoire, ou de moy conseillier
20                    Que je retraie en mon povre manoir.
                        Car je ne puis plus ainsi remanoir
                        Pour mon argent qui est mis sur le bas.
                        Or me vueillent, s’il leur plaist, procurer :
                        Et se je fail je doy bien dire « Helas ! »

[1] Saint Hilaire corrige en nautres