Balade 540 : Ceuls qui ont pris moustarde en pluseurs lieux (DCCCLXXVII)

Balade

                        Ceuls qui ont pris moustarde en pluseurs lieux                               227a
                        Doivent sçavoir que la portee[1] en vault,
                        Car de raison ilz se congnoissent mieulx.
                        Aussi doivent mieulx sçavoir li ribault
5                      Ce qu’ilz ont fait ou temps qu’ilz furent chault,
                        Dont pour les maulx qu’ilz ont fait a autrui
                        Sont si dolens[2] que mescroire leur fault :
                        Lerres ne croit soy mesmes au jour d’ui.

                        Plus vit singes[3], plus est malicieux,
10                    Ceste nature a toudis le corbault.
                        Aussi li homs de tant qu’i[4] est plus vieulx
                        Se doubte plus en l’art ou il default,
                        Car petit peut, et se sa femme sault,
                        Qui jeune soit, ce lui est grant ennuy,
15                    Car il doubte plus le bas que le hault :
                        Lerres ne croit soy mesmes au jour d’ui.

                        Telz viellars est trop merencolieux
                        Et d’agueter trop soutil et trop cault.
                        A leurs femmes font trop le dangereux
20                    Car ilz cuident qu’ol leur face l’assault
                        Comme faisoient quant ilz furent en sault.
                        Mais pour leurs maulx n’osent croire nullui.
                        Or leur doint Dieux [tres]tous biens deffault :
                        Lerres ne croit soy mesmes au jour d’ui.

[1] Ms. porter

[2] Ms. dolereus

[3] Ms. saiges

[4] SaintHilaire corrige en qu’il