Balade 539 : Je n’oy oncques tel talent de venir (DCCCLXXVI)
Autre Balade
Je n’oy oncques tel talent de venir
Pour avoir draps ne pour manger harens
En la terre qui fait les gens honnir 226d
Pour les maulx pas ne dessus les Flamens
5 Comme j’ay d’en retourner.
Riens n’y ay fait fors que moy enbouer,
Gesir vestu, boire eaue, et en la fin,
Avoir pou pain, soy tout le jour amer :
Je suis perduz quant on ne boit de vin.
10 Bien m’en devra [a] tousjours souvenir
Car j’ay eu mors mes chevaulx sur les champs
Par froit logier et les haies tenir.
Si ne me puis louer de ceuls de Gans,
Et si n’ay sceu trouver
15 Draps, couvertouers, ne homme rançonner,
Brebis, jumens, pors, vaches ne roucin,
Car les autres en ont tout fait mener :
Je suis perdus quant on ne boit de vin
S’ay grant joie quant je voy departir
20 De ces palus le roy a tout ses gens,
Et qu’il a fait toute Flandre[1] obeir
Et au conte les rent obeissans.
Je n’y quier plus demourer.
Trop froit y fait. En France vueil aler,
25 Si vivray bien, la prandray maint lopin
Pour le default que j’ay eu recouvrer :
Je suis perdu quant on de boit de vin.
L’envoy[2]
Prince, a Tournay fault vostre erre haster.
30 Ne le laissiéz pour parent ne cousin,
Ou je mourray com canne a bourbeter :
Je suis perdus quant on ne boit de vin.
[1] Ms. flandres
[2] Ms. Autre balade
