Balade 538 : S’amours ne fait par sa douce pité (DCCCLXXV)

Autre Balade

                        S’amours ne fait par sa douce pité                                                    226c
                        Piteusement recevoir ma clamour,
                        Je perd[e]ré la flour d’humilité :
                        Sçavéz que c’est ? De ma dame l’amour[1],
5                                  Qui m’avoit esté donnee,
                        Qu’autres debat. Mais se elle[2] m’est ostee,
                        En ce monde ne quier plus remanoir,
                        N’autre aprés lui jamais ne vueil avoir.

                        Car ceuls qui ont du donner poesté,
10                    Qui sont puissans et gens de haulte honour,
                        M’ont d’un acort consenti le traité
                        Ou je cuiday tout mettre mon atour.
                                    Or me fault tenir journee
                        S’a moy sera ou autre mariee.
15                    Mais se ne l’ay trop me verréz doloir :
                        N’autre aprés lui jamais ne vueil avoir.

                        Et se m’a moult la poursuite cousté.
                        Mais pis me fait encor la deshonour.
                        Se je la pers, je suis a povreté.
20                    Or vueilléz donc, mi redoubté seignour,
                                    Qui la chose avéz traittee,
                        Mon ennemi querir autre espousee,
                        Car ce g’y fail, je muir de desespoir :
                        N’autre aprés lui jamais ne vueil avoir.

[1] Ms. latour

[2] Saint Hilaire corrige en s’elle