Balade 537 : Vous qui avéz vostre teste pelee (DCCCLXXIV)

Balade

                        Vous qui avéz vostre teste pelee
                        Par accident ou de foible nature,
                        Qui cheveulx a soit sa hure avalee :                                                  226b
                        Au lieu couvrir devéz [bien] mettre cure.
5                      Un pigne aiéz toudis a l’aventure
                                    Et chapelet pour le vent.
                        Voz crins derrier faictes venir devant,
                        Se mestier est, pour bien convoitier l’astre :
                        C’est grant meschief de deffubler souvent.
10                    Pour ce [vous] lo porter queue de martre.

                        Car se martre est dessus le chief posee,
                        Les cheveulx fait tenir a leur droiture.
                        Pour ce en yver est la teste eschaudee
                        Et se puet l’en garder de la froidure,
15                    Et si ne puet percevoir creature
                                    Le mehaing legierement.
                        Qui ainsi fait, il euvre saigement
                        Car a son chief fait gracieux emplastre,
                        Mais cilz est foulz qui le fait autrement :
20                    Pour ce vous lo porter queue de martre.

                        Et se la teste est derrier desnuee
                        Et vous avéz devant cheveleure,
                        La cosme doit derrier estre menee,
                        Adonc sera la besongne plus seure.
25                    Aler devéz a chevaulx l’embleure,
                                    Que voz crins n’aillent balant.
                        Deffubléz vous toudis en avalant,
                        Sanz rebourser qu[e l’]en voye l’emplastre,
                        Ou vous seréz diffaméz laidement.
30                    Pour ce vous lo porter queur de martre.