Balade 536 : Chascuns parle de divers gieux jouer (DCCCLXXIII)

Autre Balade

                        Chascuns parle de divers gieux jouer,
                        De cliner l’œil, de porter male honte,
                        Et de la briche aux compaignons donner
                        Et de soufler le charbon, mais n’acompte
5                      A tous ces gieux nulle chose du monde,
                        Quant mon cheval m’a au besoing failli :
                        Desor me fault jouer a l’esbahi.

                        Qui trois piéz n’a pour ce ne puet aler.
                        Dieux ! quel cheval, qui n’avale ne monte
10                    Et qui me fait maugré mien demourer !
                        Est ce beaus gieux que dolens vous raconte ?                                 226a
                        Je ne pourray roy suir, duc ne conte,
                        Se li uns d’eulx ne pourvoit sur ceci :
                        Desor me fault [jouer a l’esbahi !]

15                    Las ! il me fault com saint Joseph troter,
                        Et en trotant a pié faire mon compte,
                        Besasse au coul sur un baston porter,
                        Et adviser que nul ne me mescompte.
                        Je suis cellui qui [a] joie descompte,
20                    Si que s’aucuns n’a [or] pitié de mi,
                        Desor me fault jouer a l’esbahi.

                        L’envoy

                        Princes, pour Dieu, veuilléz [moi] retourner.
                        D’aler a piet ne sçay pas bien ouvrer.
                        J’ay grant besoing de trouver un ami.
25                    Or me faictes un roucin delivrer,
                        Car s’il me fault a Rouen sejourner,
                        Desor me fault jouer a l’esbahi.