Balade 535 : He ! gentilz rois, dus de Poligieras (DCCCLXXII)

Autre Balade

                        He ! gentilz rois, dus de Poligieras,
                        Ne vous vueilliéz de France ainsi partir,
                        Metrifians mieulx de Pitagoras,
                        Rethoriques qui tant pouéz sentir.
5                      Puis que la mort fist Machaut departir
                        Et que Vitry paia de mort la debte,
                        Ne fut veu tel com vous, sanz mentir,
                        Si grant faiseur et si noble poete.

                        A tous propos faictes vers com Primas,
10                    Chascun vous veult en ce royaume oir.
                        Diz amoureus faittes et de soulas                                                     225d
                        Qui font les cuers des princes resjoir.
                        Nuls povres homs ne puet de vous joir,
                        Chose n’a non qui par vous ne soit faitte.
15                    L’en ne pourroit [ne] trouver ne querir
                        Si grant faiseur ne si noble poete[1].

                        En Languedoc ne vous embatéz pas.
                        Vueilléz de ça vos escoles tenir.
                        Se vous partéz vous y mourréz, helas !
20                    Du puis d’amours vous vueille souvenir.
                        Nul ne s’i puet a vous appartenir,
                        Car pour rimer en clos ou en charrette
                        N’est au jour d’ui, bien le puis soustenir,
                        Si grant faiseur ne si noble poete[2].

[1] Ms. pouete

[2] Ms. pouete