Balade 534 : Adieu m’amour, adieu douces fillettes (DCCCLXXI)

Autre Balade

                        Adieu m’amour, adieu douces fillettes,
                        Adieu Grant Pont, hales, estuves, bains,
                        Adieu pourpoins, chauces, vestures nectes,
                        Adieu harnois tant clouéz comme plains,
5                      Adieu molz liz, broderie et beaus se[i]ns,
                        Adieu dances, adieu qui les chantéz[1],
                        Adieu connins, perdriz que je reclaims,
                        Adieu Paris, adieu petiz pastéz !

                        Adieu chapeaulx faiz de toutes flourettes,
10                    Adieu bons vins, ypocras, doulz compains,
                        Adieu poisson de mer, d’eaues doucettes,
                        Adieu moustiers ou l’en voit les doulz sains                                    225c
                        Dont pluseurs sont maintefoiz chapellains,
                        Adieu deduit et dames qui chantéz !
15                    En Languedoc m’en vois comme contrains :
                        Adieu Paris, adieu petiz pastéz !

                        Adieu, je suis desor sur espurettes,
                        Car arrebours versera mes estrains.
                        Je pourray bien perdre mes amourettes,
20                    S’amour change pour estre trop loingtains.
                        Crotez seray, dessiréz et dessains.
                        Car li pais est detruit et gastéz.
                        Si diray lors pour reconfort au moins[2] :
                        Adieu Paris, adieu petiz pastéz !

[1] Saint Hilaire corrige en hantez

[2] Saint Hilaire corrige en mains