Balade 533 : Le plus manteur et le plus desloial (DCCCLXX)

Autre Balade

                        Le plus manteur et le plus desloial,
                        Le plus faintif en amer sanz amours,
                        Le plus vanteur d’estre bon et loial,
                        Le plus chetif qui tout fait a rebours
5                                  Est cellui qui cuide bien
                        M’amour avoir, mais il n’en sera rien,
                        Car je congnois ses diz et sa promesse.
                        Or voist ailleurs, je garderay le mien :
                        A grant moqueur fault grande[1] moqueresse.

10                    A toutes dit qu’il seufre trop de mal
                        Et qu’il languist en larmes et en plours.
                        Pour leur amour se demaine si mal
                        Qu’il n’en dort [mais] ne de nuis ne de jours,                                  225b
                                    Et que son cuer n’est pas sien,
15                    Qui sanz elles ne puet avoir nul bien.
                        Mais en rusant d’une a autre s’adresse.
                        Pour ce dit on ce mot, or le retien :
                        « A grant moqueur fault grande[2] moqueresse. »

                        Lui departi dit qu’il aime a cheval
20                    Et qu’il en a de toutes les meillours.
                        Vanter s’en suelt et a mont et a val,
                        Mais on congnoist en pluseurs lieux ses tours.
                                    De telz gens compte ne tien,
                        Chanter puelent, mais le sifler detien.
25                    A telz chanteurs respondéz courte messe.
                        Du fust qu’ilz font rendéz leur le merien :
                        A grant moqueur fault grande[3] moqueresse.

[1] Ms. grant

[2] Ms. grant

[3] Ms. grant