Balade 531 : Franche dogue, dist un Anglois (DCCCLXVIII)

Autre Balade

                        ― Franche dogue, dist un Anglois,
                        Vous ne faictes que boire vin.
                        ― Si faisons bien, dist li François,
                        Mais vous buvéz le henequin.
5                      Roux estes com[1] pel de mastin.
                        Vuillequot, de moy aprenéz
                        Quant vous yréz par [le] chemin :
                        Levéz vostre queue, levéz !                                                                224d

                        Vous n’estes pas de membres fais
10                    [Si] comme est Jaques Thommelin
                        Qui porte si merveilleus fais
                        Que vous n’y pourriéz mettre fin :
                        Ce sont deux tonneaulx de s[a]pin.
                        C’est voir, et la queue deléz.
15                    Adviséz vous, dit Franchequin :
                        Levéz vostre queue, levéz !

                        N’aléz a piet, par le temps frois,
                        Porter vostre blé au moulin.
                        S’il pluet, troussez vo[2] queue pres,
20                    Autel facent vostre voisin.
                        Et ce vous pinciéz le raisin.
                        Afin que vous ne vous crotéz,
                        Soit en France ou le Limosin,
                        Levéz vostre queue, levéz !

[1] Ms. comme

[2] Ms. vostre