Balade 530 : Les anciens furent jadis moult saiges (DCCCLXVII)
Balade comment on souloit anciennement moult honourer les saiges et anciens plus que on ne fait au jour d’ui
Les anciens furent jadis moult saiges,
Si doivent bien leur dis estre fardéz
Et qu’om tiengne leurs faiz et leurs usaiges.
Or supplions que vous y regardéz.
5 Coiffes eurent, tel estat nous rendéz,
Et nous prierons tuit pour vous et pour eulx :
Car bonnes sont a entre nous peléz
Et a tous ceuls qui ont pou de chevaulx.
Eustace suy pour les peléz messaige[s],
10 Coucy, Saint Poul, Hangest, Torcy : venéz,
G. Des Bordes, Brifaut, et a oultrages[1]
Y est Colart de Tanques despluméz :
Hugues du Bois, Moriaux, sont enrruméz,
Coiffe leur fault et [ce] a chascun d’eulx :
15 Car bonnes sont a entre nous peléz
Et a tous ceuls qui ont pou [de] cheveulx. 224c
Hutin d’Aumont, Philibert, voz mesnages
A bien mestier que coiffe demandéz.
Saint Sautlieu pert et Sausset leurs plumaiges.
20 De Poinsinet s’en est li poilz aléz :
He ! gentilz rois, vers nous vous admandéz :
Coiffes donnéz aux povres soufraiteux,
Car bonnes sont a entre nous peléz
Et a tous ceuls qui ont pou de cheveulx.
L’envoy
25 Princes, trop plus sont les aucuns grevéz,
Qui pour couvrir ont cheveulx rebourséz,
Que ceuls qui n’ont [plus] rien sur le peleux.
Pugnes leur fault et le mirouer deléz.
Si vous suppli que coiffe leur donnéz
30 Et a tous ceuls qui ont pou de cheveulx.
[1] Saint Hilaire corrige en oultraiges
