Balade 529 : A mes seigneurs sur le fait du demaine (DCCCLXVI)

Autre Balade faicte par maniere de supplicacion

                        A mes seigneurs sur le fait du demaine,
                        Suplie a tous povres Bruléz des Champs,
                        A mon seigneur le chancelier en Maine,
                        Que ses gaiges qui ne sont pas moult grans
5                                  Lui soient verifiéz,
                        Ou il sera perdus et exilliéz,
                        Et ne laira de chascun la maison
                        Jusques il ait verificacion.

                        Ses chevaulx sont a foing et [a] avoine,
10                    Qui de jeune sont lasches et meschans.
                        L’un fault laissier quant les .ii. vont a Saine,
                        Car li hostes est de trop pres guetans.
                                    Telz chevaulx sont mieulx veilliéz
                        Que nulz faucons, et s’ont les yeulx silliéz,
15                    Si que veoir grain ne pourro[ie]nt foison                                         224d
                        Jusques il ait verificacion.

                        Se delivréz n’est en ceste sepmaine,
                        Lui retourné sera de voz charlans,
                        Corps et chevaulx aréz a bonne estraine.
20                    Car il n’a plus de quoy faire despens.
                                    Sur ce poins vous aviséz,
                        Et pour le mieulx ses lettres delivréz,
                        Ou il vivra a vostre garnison
                        Jusques il ait verificacion.