Balade 527 : Ars et bruléz, esclavéz et destruis (DCCCLXIV)

Autre Balade

                        Ars et bruléz, esclavéz et destruis,
                        Homs fugitis, sanz borde et sanz maison,
                        Povres, desers et desoléz me truis
                        Par les Anglois qui m’ont ceste saison
5                                  Mis en toute povreté.
                        .ii^m. frans m’a leur guerre cousté.
                        Ne je ne voy conseil en ma besongne,
                        Si je ne suis briefment reconforté
                        De mes seigneurs d’Anjou et de Bourgongne.

10                    Or leur suppli tant humblement que puis
                        Qu’avoir vueillent ma supplicacion.
                        Car par achat d’ostel recouvréz suis,
                        Mais il ne tient qu’a la solucion :
                                    Aient de mon fait pitié.                                                           223d
15                    Si seray lors a Paris heritié.
                        Pour .vi^c. frans me trairont hors d’essoigne[1],
                        S’en mercieray lors la benignité
                        De mes seigneurs d’Anjou et de Bourgongne.

                        Vueillent au roy monstrer que je suis cuys :
20                    Il m’aidera par leur bonne raison
                        De .iii^c. frans. D’autre chose ne ruis.
                        D’autres .iii^c.[2] m’a fait donacion
                                    Mon seignour, en verité,
                        Qui d’onneur tient la souveraineté.
25                    Or ne vueillent en mon fait mettre alongne :
                        Ainsi seray par le bien conforté
                        De mes seigneurs d’Anjou et de Bourgongne.

[1] Saint Hilaire corrige en d’essoingne

[2] Ms. .iii^c. frans