Balade 526 : On ne pourroit pas pais trouver (DCCCLXVI)

Autre Balade sur les maiours de Veucquessin

                        On ne pourroit[1] pais trouver
                        Non pas pais, mais un anglet,
                        Que chascun deust[2] plus louer
                        De Vequecin, car on y fet
5                      Le maieur de bonne maniere.
                        Douze villains, en la vessiere,
                        Sont a vesses cueillir enclin,
                        Chascun plain poing. Puis vont arriere :
                        Dieux gart les veaulx de Veucquessin !

10                    En un parc se vont assembler.
                        Chascuns vesses en son poing met,
                        Et puis laiss’on le veel aler
                        Qui d’aler vers eulx s’entremet.
                        De la vesse qu’il prant premiere
15                    Fait on maieur a liee chiere :                                                              223c
                        Cellui qui la portoit en fin
                        Est levéz sur une espanniere :
                        Dieux gart les veaulx de Veucquessin !

                        Les veaulx doivent asséz amer,
20                    Mais trop leur ont vaches forfet,
                        C’une foiz, a leur retourner
                        Des champs y ot merveilleus fet :
                        Car une vache par derriere
                        De sa queue, que elle avoit fiere,
25                    Porta un escuier souvin,
                        Le trouva et en fist litiere[3] :
                        Dieux gart les veaulx de Veucquessin !

[1] Ms. pourroit pas

[2] Ms. doit

[3] Ms. livree