Balade 525 : Chascun me dit que suis grans (DCCCLXII)

Balade

                        Chascun me dit que [je] suis grans
                        Et que je fais bien le seigneur
                        Et que j’ay grant nombre de frans.
                        Helas ! dont me vient ceste honneur ?
5                      Pour ce qu’om me voit en tristeur
                        Et que je suis comme nemo,
                        L’en se moque de ma doleur :
                        Je suis de paupere regno.

                        S’en deviens pensis et pesans,
10                    Car ceuls qui bien gardent le leur
                        Ont prez, terres, vignes et champs
                        Et se vivent de leur labour,
                        Et je me voy au lit de plour                                                                223b
                        Par [trop] despendre a gaingner po.
15                    Mais j’ay mis le plus beau defueur :
                        Je suis de paupere regno.

                        J’ay servi, dont je suis meschans,
                        Sanz cueillir ne feuille, ne fleur,
                        Vielle femme et jeunes enfans
20                    Qui m’ont faicte mainte langour
                        Sanz remerir, de quoy je plour,
                        Quant je n’ay ne recept ne tro.
                        Penséz [y] bien, grant et meneur :
                        Je suis de paupere regno.