Balade 523 : Se jamais jour ne vantoit .iiii. vens (DCCCLX)

Autre Balade

                        Se jamais jour ne vantoit .iiii. vens,
                        Si seroit bien ly mondes aventéz,
                        Car chascun dit au jour d’ui : ― Je me vens
                        Que je suis grant et bien emparentéz.
5                      Et l’autre dit : ― Que je suis bien rentéz,                                           222d
                        Qui maintefoiz n’a vaillent une moufle,
                        Se l’un dit voir, l’autre dit : ― Vous mentéz :
                        Il ne vaut rien au jour d’ui qui ne soufle.

                        Chascuns promet, mais que vault telz convens
10                    Quant sur mentir le principe est entéz ?
                        Telz prometteurs sont deceuz decepvens,
                        Qui de voir dit n’ont pas les dens dentéz.
                        C’est cy faulx vens qui est cy augmentéz
                        Que chascuns dit : ― C’est li chans de l’escouvle,
15                    Dont ly mondes est tout empulentéz.
                        Il ne vault rien au jour d’ui qui ne soufle.

                        Ceste feste a tous les mois ses advens
                        Et chascun jour en son pluseurs temptéz
                        Qui, au coucher et quant ilz sont levéz,
20                    Souflent si fort qu’en[1] suis espouentéz :
                        Mauditte soit si fausse voluntéz
                        Et qui troua premierement tel soufle
                        Dont pluseurs sont destruit et tourmentéz :
                        Il ne vault rien au jour d’ui qui ne soufle.

[1] Ms. que jen