Balade 522 : Chascun me dit : Dieu gart ! Dieu gart ! (DCCCLIX)

Autre Balade

                        Chascun me dit : ― Dieu gart ! Dieu gart !                                           222c
                        Plus d’omme compte ne tenéz,
                        Mectéz de ces flourins a part.
                        Vous faictes ce que vous vouléz.
5                      Adonc suis je tout forsenéz
                        En disant : ― Vous me ruséz bien.
                        Povre suy, pour ce me moquéz :
                        Je me tue et si ne faiz rien.

                        Grans sires li siens[1] ne depart
10                    A pluseurs, si com vous cuidéz.
                        Qui trop s’i fie, il est coquart,
                        Car s’aucune chose en avéz
                        Ce et plus y despanderéz
                        Avant qu’il vous [en] aille bien ?
15                    De ce fait suis acertenéz :
                        Je me tue[2] et si ne faiz rien.

                        Mais encor[3] vault il mieulx a tart
                        Soy congnoistre que estre assotéz,
                        Et que l’en advise aucun art
20                    Dont l’en puist estre gouvernéz.
                        Car cilz est de bonne heure nez
                        Qui puet et scet vivre du sien.
                        Penser y vueil. ― Or y penséz.
                        ― Je me tue et si ne faiz rien.

[1] Saint Hilaire corrige en le sien

[2] Ms. partue

[3] Ms. encore