Balade 521 : Je me complaing de toute creature (DCCCLVIII)

Autre Balade

                        Je me complaing de toute creature                                                   222b
                        Mais des bestes me puis asséz louer,
                        Qui ensuivent et aiment leur nature
                        Et vont entr’eulx pour leur forme garder,
5                      Et tous oiseaulx vont leur femelle amer.
                                    Mais seulx homs, dont je me dueil,
                        Ne veult amer dame, par son orgueil,
                        Ains la defuit et son per aime a part,
                        Tant que je voy par tout tristesce et dueil :
10                    Amour n’y voy fors l’amour de Renart.

                        Ou temps jadis tesmoigne l’escripture
                        Que l’en souloit danvier et karoler,
                        Et que dames avoient leur droiture
                        Des chevaliers veoir et honourer,
15                    Et eulx aussi des dames entramer
                                    Et estre de bel acueil.
                        Mais dame n’est qui ose lever l’ueil,
                        Car de dolour ont dolereuse part.
                        De leur hostel n’osent passer le sueil.
20                    Amour n’y voy fors amour de Renart.

                        Ainsi chascun se pert et desnature.
                        Et l’en souloit les grans fais achever
                        Par vraie amour qui estoit ferme et pure,
                        Que les vaillans sçavoient bien celer,
25                    Mais a present veulent tout reveler,
                                    Dont tele honte recueil
                        Que tous hommes desormais hair vueil,
                        Quant decliner les voy de leur droit art.
                        Je suis Raison, qui puis juger a l’ueil :
30                    Amour n’y voy fors l’amour de Renart.