Balade 518 : On dit qu’eschaudéz yaue craint (DCCCLV)
Autre Balade
On dit qu’eschaudéz yaue craint,
Poissons batu fuit le fillé,
Et cerf qui a esté emplaint,
Et chaz qui a le cul brulé.
5 Mais de ce sont trop aveuglé
Pluseurs qui vont aux mandemens
Dont ilz sont destruit et gasté : 221c
G’y renonce : a Dieu les commans !
Maint seignour escrivent a maint,
10 Qui souvent en sont triboulé :
― Soiéz a nous, et ne remaint,
A ce jour monté et armé,
Et vous ne seréz ja moqué.
Pour moys aréz quatorze frans,
15 Chevalier .xxx., est ce vo gré ?
G’y renonce : a Dieu les commans !
Car maint homme de ce se plaint,
Qui en est povre et endebté,
Dont il n’est [ne] saincte ne saint
20 Qui n’en soit sanz cause blasmé.
L’en n’a croix, s’est contremandé,
La pert on chastel et despens :
Voist qui veult, j’en suis retourné :
G’y renonce : a Dieu les commans !
L’envoy
25 Princes, qui d’aler la se faint,
Consideré les contremans,
Saiges est. Si dy comme abstraint :
G’y renonce : a Dieu les commans !
