Balade 517 : Puisqu’il me fault aler au mandement (DCCCLIV)

Autre Balade sur les mandemens du roy

                        Puisqu’il me fault aler au mandement
                        Ou mois d’aoust et en septembre aussi,
                        En un pais ou n’a blez ne fromment,
                        Vigne[1] a gaster ne fruis, j’avise yci
5                      Que four me fault, moulin, blef autressi,
                        Grange, grenier pour trousser derrier moy,
                        Cave et celier. Je vueil aler garny :
                        En cel estat puis bien servir le roy.

                        Or me convient porter hebergement
10                    Pour reposer quant seray endormi,
                        Draps a couvrir, chars et vaissellement,                                           221b
                        Harnois entier contre mon ennemi,
                        Se tout ce n’ay, je suis mort a demi,
                        Comme Rolant languiroie de soy.
15                    Mais se j’ay foing et avoine emprés mi,
                        En cel estat puis bien servir le roy.

                        S’un sommier puet tout porter prestement,
                        Du voyage gaires ne m’esbahy,
                        Car je vivray en ce cas largement
20                    Et trestous ceuls qui le feront ainsi,
                        S’autre bien n’ont, veu qu’argent est failli
                        Et que les fors tiennent tout soubz leur loy,
                        Quoy qu’on die, je seray desconfi :
                        En tel estat puis bien servir le roy.

                        L’envoy

25                    Prince, qui veult en yver mener gent
                        Doit moult doubter le gresil et la noy.
                        Mais quant au fort, se j’ay or et argent,
                        En tel estat puis bien servir le roy.

[1] Ms. Vignes