Balade 517 : La fievre quarte et la double tierçainne (DCCCLIII)

Autre Balade

                        La fievre quarte et la double tierçainne,
                        Le mau saint Leu et le saint Matelin,
                        La rage es dens, ou chief goute, migraine,
                        Les tranchoisons du ventre et l’avertin[1],
5                      La goute es flans et le mau saint Quentin
                        Puist [il] avoir qui mari me donna,
                        Et le gros mal au soir et au matin,
                        Et panduz soit qui ainsi m’assena !

                        D’ydropisie ait il la pance plaine,
10                    Thisiques soit et ethiques en fin,
                        La gravelle ait .xviii. foiz la sepmaine,
                        Esquinance, soit son corps palasin,
                        De saint Fiacre puist estre pelerin
                        Et de saint Mor qui par goutes fina,
15                    Et a tous mauls soit offert et enclin                                                   221a
                        Et panduz soit qui ainsi m’assena !

                        Honteuse mort lui soit briefment prochaine !
                        Car mon baron m’est trop cruel voisin.
                        Je n’ose aller en bois, ville ne plaine,
20                    Dancer, chanter, manger, boire de vin,
                        Que le villain, a guise d’un mastin,
                        Ne m’abbaie, crians, « Que fais tu la ? »
                        Perdue suis, maudis soit, sy deffin,
                        Et pandus soit qui ainsi m’assena !

                        L’envoy

25                    Princes, qui a franchise en son demaine,
                        Se saiges est, ja ne le guerpira.
                        Vray mari [ai] qui me fait trop de paine,
                        Et panduz soit qui ainsi m’assena !

[1] Ms. de lavertin