Balade 516 : J’ay un varlet, qui le vouldroit louer (DCCCLII)

Balade

                        ― J’ay un varlet, qui le vouldroit louer,
                        Que son pareil ne trouveroit on mie.
                        ― De quoy sert il ? ― De boire et de jangler.
                        Il het chevaulx, ne leva en sa vie
5                      Sanz lui trois foiz appeler.
                        En cuisine ne scet un œuf peler,
                        Non pas servir lui meismes a la table,
                        Mais il scet bien viande demander.
                        ― Je n’en vueil point. Varlet soit il au diable !                                  220d

10                    ― Ba ! si feréz. Il ne[1] met a lever
                        En trestous temps plus de lieue et demie,
                        N’il n’est homme qui le feist haster
                        Que sa teste ne fust avant pignie.
                        S’on ne [le] laisse aprester,[2]
15                    Tout a par li sanz venir […][3]
                        Fors au disner, la est il servissable
                        Pour desservir souvent sanz commander.
                        ― Je n’en vueil point. Varlet soit il au diable !

                        C’on t’en oie : scet il lire ou chanter
20                    Ne escripre chose que l’en lui die ?
                        ― Certes, nenil. Mais bien scet murmurer
                        Et esmouvoir riote a la mesnie.
                        Trousser ne veult ne maler,
                        Chambre fournir ne cheval estaler,
25                    Car il se tient pour varlet honourable.
                        Vous ne pouéz nul meilleur recouvrer.
                        ― Je n’en vueil point, varlet soit il au diable !

[1] Ms. se

[2] Les vers 13 et 14 sont écrits en un seul dans le ms.

[3] Vers incomplet