Balade 519 : Pales et vers, longue teste et cocue (DCCCLVI)

Autre Balade

                        Pales et vers, longue teste et cocue,                                                 221d
                        Yeulx de perdriz et nés de chahuant,
                        Groing de pourcel, long coul comme une grue,
                        Bossus derrier et enfosséz devant,
5                      Ventre a soufflet, cuisses de coqmarant,
                        Hanches de buef et jambes de heron,
                        Cul d’estourneau, gros genoulz d’oliphant :
                        Qui oncques vit corps de telle façon ?

                        Uns longs piéz plas qui ont oingnons en mue,
10                    Grans chevilles qui se vont ataingnant,
                        Mule avéz es talons[1] parmy la rue,
                        De lascheté vont voz membres tremblant,
                        A vostre aller en faictes bien semblant,
                        Et voz deux bras semblent estre baston,
15                    Ongles de chien, longue main et meschant :
                        Qui oncques vit corps de telle façon ?

                        Bien ressembléz une coquesague,
                        Barbe n’avéz, et [si] dient auquant
                        Que vous avéz la creste si ague
20                    Qu’en voz fourreaux n’a marteau ne sonnant.
                        Vous vous tuéz, com fait le pellicant,
                        A vostre bec de boire, ce dit on,
                        Et de manger a guise de gourmant :
                        Qui oncques vit corps de tele façon ?

[1] Saint Hilaire édite Mules es talons avez