Balade 514 : Qui a mestier d’avoir un bon servant (DCCCL)

Autre Balade

                        ― Qui[1] a mestier d’avoir un bon servant ?
                        Juenes homs suis, aprestés de servir.
                        ― De quoy sers tu ? ― Je suis bien chevauchant,
                        Je sçay trancher, moy en cuisine offrir,
5                      Male trousser et au besoing pestrir,
                        Garder chevaux et une chambre tendre,
                        Je sçay pignier, un lit faire et fournir.
                        Nulx, Dieu mercy, ne me scet riens aprandre.

                        Je sçay aler et parler entre gent,
10                    Compter, getter, le mon maistre tenir,
                        Faire ses fraiz, gouverner son argent,
                        Escripre asséz pour mon fait soustenir,
                        Rendre compte sanz le sien retenir,
                        Songneusement a sa besongne entendre.
15                    De ce me puet bien laissier convenir :
                        Nulx, Dieu mercy, [ne me scet riens aprandre.]

                        Je couche tart, je suis si diligent
                        Que je n’en puis reposer ne dormir,
                        Je descouche devant soulail levant,
20                    Tousjours sui prest, oncques ne vueil mentir,
                        On me puet [bien] ses consaulx descouvrir,
                        Je suis preudon sans riens de l’autrui prendre.
                        ― Je te retien. ― Et je vueil obbeir :
                        Nulz, Dieux mercy, ne me scet riens apprendre.

[1] Ms. Qui oncques