Balade 512 : Se grant corps eust cuer en hastivité (DCCCXLVIII)

Autre Balade

                        Se grant corps eust cuer en hastivité,
                        Grous et felon, mains ussent orphenin
                        Et li petis feussent trop rebouté :
                        Pour ce est moyen entre ces deux afin.
5                      L’en voit souvant ploier le hault sapin,
                        Mes le buisson ne se ploie a nul fuer,
                        Ains pique et point trop plus que [le] grant pin :
                        Pour ce mist Dieux en gros corps petit cuer.

                        Li petit sont pour leur cuer rebouté,
10                    Plus tost muevent que roe de moulin.
                        Mais pour leur corps ont peu de poesté,
                        Et li grant sont de debonnaire engin.
                        Leur lasche cuer ployent com[1] jong marin,                                      220d
                        Tart se muvent, paour ont, crainte et pleur.
15                    S’autrement feust, tout m[e]issent a fin.
                        Pour ce mist Dieux en grant corps povre cuer.

                        Li petit ont leur sanc plus apresté,
                        Car leur membres sont prez du cuer voisin.
                        Pour c’est plus tost devers le cuer monté
20                    Que des grans corps qui ont cuer de poussin.
                        Des membres vient leur sanc par long chemin,
                        S’ont mouvement plus tardif par defuer,
                        Dont je concluz par ces moyens et fin :
                        Pour ce mist Dieux en grant corps povre cuer.

[1] Ms. comme