Balade 510 : Quelz choses sont c’on doit plus honorer (DCCCXLVI)
Autre Balade
Quelz choses sont c’on doit plus honorer
Et dont chascuns doit plus grant compte faire,
Qui font les gens de la mort respiter,
Qui font paier et remerir salaire, 219c
5 Qui font l’argent de maint paiz attraire,
Qui[1] nous font[2] a la foy estre enclin ?
Ce sont [quatre], qu’en ce ver vous declaire :
Ancre, cire, pappier et parchemin.
Quant aucun va mourdrir autre ou tuer,
10 Chartre lui faut, vers la court se doit traire.
Et si couvient pour finance lever
Ancre et pappier, autel pour sattisfaire.
Et la loy faut escripre a .i. libraire,
Car autrement tost yroit a declin.
15 Pour guerir fault, dont je ne me puis taire,
Ancre, cire, pappier et parchemin.
Donc doit chascuns la brebis [bien] louer,
Et viéz drappiaux ne lui doivent desplaire.
Les mouchetes font les lettres sceler,
20 L’ancre les fait assevir et pourtraire :
S’on vous doit riens, l’en dit au secretaire :
« Delivréz moy, trop me fait de hutin. »
Lors aréz vous [tout] ce qui vous doit plaire :
Ancre, cire, pappier et parchemin.
L’envoy
25 Prince, au jour d’ui voit on tout tribouler,
[Et] je n’i voy nul remede trouver
Fors que lettres qui vont par le chemin.
Maiz quant au fort, qui veult guerre mener,
Ne li fault rien[3] autre chose ordonner
30 Qu’ancre, cire, pappier et parchemin.
[1] Saint Hilaire supplée Et q.
[2] Ms. fait
[3] Ms. bien
