Balade 509 : Guerre me font tuit li .iiii. element (DCCCXLV)
Autre Balade
Guerre me font tuit li .iiii. element,
Les dieux de l’air, de feu, d’eaue et de terre.
Mars me destruit par son embrasement
Et Saturnus par froit me vient requerre, 219b
5 Cerés mes blez acravante et atterre
Et mes vingnes a destruictes Bachus.
Jupiter pleut, qui de gresil m’enserre :
De tous ses[1] maulx est servie Vertus.
Arse ay esté toute generalment
10 Par ceulx de Bruth, de l’ille d’Angleterre,
Puis m’a forgé foudres espessement
Vultons[2] li dieux. Contre moy Fortune erre
Tant que ne sçay fruis, blez ne vins enquerre.
Mes noms est trop arrebours entendus,
15 Chascuns me fuit. Qui bien en veult enquerre.
De tous ses[3]maulx est servie Vertus.
Vertus n’est pas. On m’appelle autrement :
Confusion, s’en est la droitte serre.
Fermer me vueil, maisonner ensement
20 Et n’ay de quoy, ne riens ne puis acquerre :
Autre place me convandra conquerre
Et autre nom, le mien est confondus.
Deserre suis et chascun me fait guerre :
De tous ces maulx est servie Vertus.
L’envoy
25 Prince[4], et vous, dieux et deesses, de gent
Qui les fourmes muéz [completement]
Comme jadiz fu mué Antheus,
Muéz mon nom et ostéz mon tourment :
Biens me deffuit, Atropos m’entreprent :
30 De tous ces maulx est servie Vertus.
[1] Saint Hilaire corrige en ces
[2] Saint Hilaire corrige en Vulcans
[3] Saint Hilaire corrige en ces
[4] Ms. Princes
