Balade 505 : Dieux, que je suis dolente et esbahie (DCCCXL)

Balade

                        Dieux, que je suis dolente et esbahie
                        Comme je voy sans cause mon ami
                        Desloyaument faire nouvelle amie,
                        Qui des long temps s’estoit donné a mi,
5                      Et il se part[1] et m’a du tout guerpi
                        Sens dire adieu, li desloyaulx prouvéz !
                        Maiz j’en reprends[2] bon reconfort aussi :
                        Pour un perdu j’en ay deux retrouvéz !

                        Qui loyaulx est en l’amoureuse vie
10                    A point ara jamés joye de lui,
                        Maiz qui y ment et sert de tricherue,
                        Il est amé, comme a esté cellui
                        Qui en mentant m’a de tous poins failli.
                        Bien est par moy faulx amens esprouvéz.
15                    Courcee en sui, or m’en conforte[3] ainsi :
                        Pour un perdu j’en ay deux retrouvéz !

                        Voist donc a Dieu, par ma faulte n’est mie[4],
                        Pour ce, dames, a toutes vous suppli[5]
                        Que vous servéz de la nappe ploye
20                    A ces[6] amens qui font sy le joly.
                        Piz leur feréz, mieulx aréz, je vous dy,
                        Et plus servans tousjours les trouverréz[7].
                        D’Amours me plaing, maiz au fort, Dieu merci,
                        Pour un perdu j’en ay deux retrouvéz !

[1] Ms. depart

[2] Ms. reprendre

[3] Ms. reconforte

[4] Ms. traye

[5] Ms. supplie

[6] Ms. Assez

[7] Saint Hilaire corrige en trouverez