Balade 504 : Telz fait souvent bien le religieux (DCCCXXXIX)

Autre Balade

                        Telz fait souvent bien le religieux
                        Et telle fait aussi la Magdalaine,
                        Portans cotes et habis marmiteux,
                        Qui ont toudiz aussi verde la vayne
5                      Que de telz gens menent vie mondaine,
                        Combien que aucuns[1] dient de tel et telle
                        « C’est droitement Jhesus sur une pele. »

                        Devant les gens font sy le gracieux
                        Qu’a paine ist il de leurs corps poux n’alayne,
10                    Maiz ce font il comme malicieux.
                        L’en congnoist mal le mouton a la layne.
                        Tel malice leur voulenté amayne
                        A leur effort. Rouges sont desoubz l’ele :
                        C’est droitement jhesus sur une pele.

15                    De telles gens dist nostre sire[2] Dieux,
                        Quant on les voit vestus de pel humaine,
                        Comme brebis faisant[3] le precieux,                                                   218b
                        Que bonne euvre n’est pas en eulx certaine.
                        Faictes leurs diz, maiz nulz leurs faiz ne praigne,
20                    Car qui les voit a leur couleur moretelle,
                        C’est droitement Jhesus sur une pele.

[1] Saint Hilaire corrige en qu’aucuns

[2] Ms. messire

[3] Ms. faisons