Balade 502 : Qui ne chevauche et qui n’est bien montéz (DCCCXXXVII)

Balade

                        Qui ne chevauche et qui n’est bien montéz,
                        Qui ne poursuit et qui n’a grant estat,
                        Bassinet nuef et tout entier arméz,
                        Et qui ne va [la] ou l’en se combat,
5                                  Chascun dit qu’il ne vault rien :
                        C’est uns chetifs qui espargne le sien.
                        Oncques ne vit sachier du fuerre espee.
                        Maiz se pluseurs s’avisassent tresbien,
                        Ja ne deissent sur autrui tel[1] goulee.

10                    Pluseurs y vont qui en sont endebtés,
                        Qui de paier font sovent grant debat
                        Et en la fin en sont desheritéz,
                        Et se portent leurs besongnes de plat.
                                    De telz gens compte ne tien,
15                    C’est droictement un va tost et revien
                        Sur povres gens qui composent l’armee.
                        Mais s’il sceussent qu’ont fait li ancien,
                        Ja ne deissent sur autrui tel[2] goulee.

                        S’uns homs ne va, est il donc reboutéz,
20                    Destruire autrui[3], grever et fair mat,
                        Et acquerir mille pechéz mortelz
                        Ou nulle honeur maintes foys ne s’embat ?
                                    Nennil, mieulx li vaurroit bien
                        Vivre envers Dieu, comme vray crestien,
25                    Que faire mal pour avoir renommee.
                        S’aucuns seussent ce mot, or le retien,
                        Ja ne deissent sur autrui tel[4] goulee.

[1] Ms. telle

[2] Ms. telle

[3] Ms. Autrui destruire

[4] Ms. telle