Balade 499 : Aucuns dient : Grant peine est de veiller (DCCCXXXIV)

Autre Balade

                        Aucuns dient : « Grant peine est de veiller,
                        D’avoir tierçaine ou fievre tout a fait,
                        Ou mal ou ventre, ou d’estre prisonnier,
                        D’avoir goutes de quoy l’en crie et brait.
5                      Ou gehinéz estre pour son meffait. »
                        Maiz c’est tout riens au regart que je prens :
                        Il n’est doleur fors que[1] le mal des dens !

                        Tel mechief n’a femme pour travailler,
                        Mal de teste telle doleur ne fait,
10                    Car on ne puet ne boire ne mangier,
                        Mais fault crier mal gré que [l’on] en ait.
                        On ne pourroit pis avoir par souhet.
                        Qui a tel mal plus est que hors du sens :
                        Il n’est doleur fors que[2] le mal des dens.

15                    On ne pourroit dormir ne commeillier.
                        Qui tel mal a mainte male nuit trait,
                        Quant il espoint, il convient erragier.
                        La joe enffle, li viaires deffait,
                        Et d’en garir ont pluseurs moult de plet,
20                    Qui tout gastent quant il couchent dedens :
                        Il n’est doleur fors [que] le mal des dens.

[1] Ms. que fors

[2] Ms. que fors