Balade 495 : Simon Ployart, treschier et bon ami (DCCCXXX)

Balade

                        Simon Ployart, treschier et bon ami,
                        Au contenu en une lettre close
                        Que vous avéz envoié devers mi
                        A toutes fins, au contraire m’oppose,
5                      Pour [ce que] c’est a croire dure chose
                        Qu’estre doy[e] tristes, chetis et mas,
                        Pour mariage, ouquel je ne suis pas.

                        Qu’aye bon temps perdu, je le vous ny
                        Absolument, car bien dire vous ose
10                    Que je seray plus gay et plus joly
                        C’onques ne fu, car vraye amour enclose
                        Est en mon cuer, et par ce je suppose
                        Qu’estre ne puis de bonne vie au bas
                        Pour mariage, ouquel je ne suis pas.

15                    Pour ce, compains, treschierement vous pri
                        Que nous prenons un juge qui despose
                        De ce debat. J’acepte le bailli
                        De Rethelois, qui bien verra la close.
                        Dictes vo fait et je le mien en prose :
20                    Ja ne quier estre que compains, en tous cas,
                        Pour mariage, ouquel je ne suis pas.