Balade 494 : He ! Eustace, dire pués desormés (DCCCXXIX)

Balade par Simon Ployart

                        He ! Eustace, dire pués desormés :
                        « Adieu bon temps ! » car tu l’as tout perdu.
                        Soies certain, plus n’en auras jamés,
                        N’encor ne scez pas qui est advenu.
5                      Car jusques cy l’en t’a tousjours tenu
                        Bon compaignon, et tu seras claméz
                        Chetifs, dolens, es tu bien mariéz ?

                        Plus ne feras[1] chançons ne virelaiz,
                        Et si en as bien le mestier sceu.
10                    Ains te fauldra entendre a trop de plaiz,
                        Qui jour et nuit te seront esmeu.
                        Las ! ty conseil ne seront pas creu,
                        Ains fera l’en contre tes voulentéz.
                        Chetifs, dolens, es tu bien mariéz ?

15                    Jamaiz nul jour n’auras [ne] bien ne paix,
                        Maiz si fort temps qu’oncques plus fort ne fu.                                 216c
                        Scez que feras ? Fuy t’en a grant eslays,
                        Car l’en te voit ja du tout abatu.
                        Quant espouséz seras, que feras tu ?
20                    Bien porras dir qu’a ta fin es aléz :
                        Chetifs, dolens, es tu bien mariéz ?

[1] Ms. feray