Balade 493 : He ! Fortune, que je doy [bien] hair (DCCCXXVIII)

Autre Balade

                        He ! Fortune, que je doy [bien] hair
                        Et maudire ta grant furosité,
                        Ton faulx samblant, ton perilleux air
                        Et ce qu’en toy n’as estabilité,
5                      Quant tu m’as fait par [grant] iniquité,
                        Soudainement, dont je suis amatiz,                                                  216b
                        Perdre le mien et a Reins la cité,
                        Cappitaine de la foire aux chetifs.

                        Je n’ay robe que je puisse vestir,
10                    Cheoir me fault en grant aversité.
                        Chevaux, joyaulx et finance tolir
                        M’as fait, et de prosperité
                        Sui descendus en tel mendicité
                        Que je seray claméz, ce m’est avis,
15                    De trestous ceulx ou j’ay affinité,
                        Cappitaine de la foire aux chetifs.

                        Si ne veil pas a la foire faillir,
                        Ainçois y vien a grant hativité,
                        Et a saint Mars veil mon offrande offrir
20                    D’une m[a]aille, en grant humilité.
                        Faire le doy, pour ce m’en suis hasté.
                        Si doy estre tenus en ce pais
                        En hault estat de la chetiveté,
                        Cappitaine de la foire aux chetifs.