Ballade 492 : De tous paiz est li plus maleureux (DCCCXXVII)

Balade

                        De tous paiz est li plus maleureux,                                                    216a
                        Li plus chetifs et li plus diffaméz,
                        Li plus failliz et li plus souffraiteux,
                        Li plus haiz et li plus affaméz
                        […][1]
5                                  Li povres pais de Brye
                        Qui en tous temps froidure bret et crie,
                        Si qu’a point le veult nulz approucher,
                        Car trop scevent Briois de tricherie :
                        L’en leur doit bien tel paiz reproucher.

10                    Leurs labeurs sunt de terres sumptueux,
                        Maiz li proffis est povres de leurs blez :
                        Se il en ont pour vivre, il sont eureux.
                        Bestes suavages les gastent de tous lez.
                        Nulz paiz n’est par leur fait recouvrés,
15                                Maiz, leur despoulle faillie,
                        Est la maison des voisins assaillie,
                        Le prennent il ce qui leur est mestier,
                        Ou autrement perdroient [tost] la vie.
                        L’en leur doit bien tel paiz reproucher.

20                    Briois ne voy qui ne semble frileux,
                        Car leur paiz est toudiz engelléz.
                        Pour la froideur se couchent deux et deux,
                        Maiz ilz ont v ins, que Dieux en soit loéz :
                        C’est des haies dont il font prenneléz.
25                                Et si convient que je die
                        Que le chemin, [monstrer] lieue ou demie
                        Ne scevent pas a un seul estrangier.
                        Forvoie[nt] moult villain, Dieux les maudie !
                        L’en leur doit bien tel paiz reprocher.

[1] Vers non édité ou vers manquant non signalé