Balade 491 : Je n’ay cure, se dist frere Bernars (DCCCXXVI)

Autre Balade

                        Je n’ay cure, se dist frere Bernars,
                        D’aler conquerre les estranges paiz,
                        Ne d’estre preux ou Julius Cesars
                        Ou comme furent Alixandre et Daviz,
5                                  Ne du sans [de] Salomon,
                        Ne que j’aye la beauté d’Absalon,
                        Qu’a nulle rien qui soit ne sui enclin
                        Fors que tousj ours asséz boire de vin.

                        D’avoir loange et priz de toutes pars,
10                    De grant richesse, de puissance, d’amis,
                        De chiens, d’oisiaux, de rivieres, de pars,
                        Que pluseurs m’ement ou que je soye haiz,
                                    Ne de dame de renon
                        Tant soit plaisant, ne dorroie un bouton :
15                    Pour mon deduit je ne veil en ma fin
                        Fors que tousjours asséz boire de vin.

                        Et se l’en dit que je soye coquars,
                        Et que je deusse estre preux et hardiz,
                        Je voy asséz plus vivre les couars
20                    Que ceulx qui vont contre leur annemis.
                        Un trait d’archier les a tost a mort mis.
                                    Maiz quant j’oy a mon bandon
                        De ce bon vin dont Beaune [nous] fait don,
                        Estre ne quier clers ne parler latin,
                        Fors que tousjours asséz boire de vin.