Balade 490 : Vous qui honneur, armes, dames améz (DCCCXXV)
Balade
Vous qui honneur, armes, dames[1] améz,
Qui poursivéz pour los et priz acquerre,
Tous amoureux qui vous entremettéz
De faire diz et chançons sur la terre,
5 De vous me guermente et [me] plain,
Du plus faingnant, faux[2] et mauvaiz villain,
Qui oncques fust et le plus grumeleux,
Uns vaillans roys [qui est l’un] des troiz preux
Par le moroer ou Narcisus ama
10 Vous ensengne son manoir, par ces deux :
Benoit soit il qui le visitera !
En blancissant prie les gens : ― Venéz
Veoir mon lieu, je vous en veil requerre,
Compaignie de dames m’anenéz
15 Pour festoiéz, ou a vous suis de guerre.
Pour ce a sa priere et clain
Troiz nobles dames y menay l’andemain.
Maiz lui sachent vuida le maleureux :
Pour deux poussins qui furent rupieux,
20 Mis ou haste telement s’ayra,
Qu’a son retour [en] fu presque fayreux :
Benoit soit il qui le visitera !
Car en son lieu qui vous est denomméz
A bon logis, se vous le savéz querre.
25 En trespassant un jour vous y tenéz, 215d
Vous y pouéz un bon secour conquerre.
Maiz mettéz par tout la main,
Ou vous mourréz [et] de soif et de fain,
Car plus chetifs ne fust oncques pareux,
30 […][3]
Loiauté oncques ne fist ne ne fera,
Fors tant qu’il est de mesdire oultrageux.
Benoit soit il qui le visitera !
[1] Ms. et armes et dames
[2] Ms. me faux
[3] Vers manquant
