Balade 489 : Riches homs doit tousjours tendre a honneur (DCCCXXIV)

Autre Balade

                        Riches homs doit tousjours tendre a honneur
                        Et li povres a mestier de prouffit.
                        Maiz au jour d’ui, maint terrien seigneur
                        En font ainsi que l’evangile dit :
5                      A tel qui a donnent sans contredit,
                                    Et a cellui qui n’a rien
                        A l’en souvent priz et osté le sien.
                        Aux povres gens ceste regle ne fault.
                        Povres homs sui, [et] m’aperçoy trop bien
10                    Qu’onneur vault po, puis que proffit defaut.

                        Riches puissans, pour acroistre s’honneur[1],
                        Ne doit du sien aux bons faire esconduit.
                        Donner leur doit, non pas tolir le leur,
                        Car en donnant les cuers prent et ravit,
15                    Et en tolent perilleusement vit[2].
                                    Et pour ce li ancien
                        Juif, sarrasin, ebriu, et chrestien,
                        Dont .ix. preux sont qui renommee assaut,
                        Esprouverent ou ciecle terrien
20                    Qu’onneur vault po, puis que proffit deffaut.

                        Par leurs biaux dons firent mainte tremeur                                     215c
                        Aux rebelles qui furent desconfit.
                        Es cuers avers se boute desonneur,
                        Qui oncques bien ne vaillance ne fist.
25                    Or praingne dont chascun parle[3] a mon dit
                                    Et face au povre homme bien.
                        L’onneur pour toy qui es riche retien,
                        Et ce disoit mareschal[4] Bouciquaut.
                        Car au povre homme, quant est de moy, je tien
30                    Qu’onneur vault po, puis que proffit deffaut.

[1] Sain Hilaire édite onneur

[2] Ms. vis

[3] Saint Hilaire corrige en garde

[4] Ms. le mareschal