Balade 487 : Dyonides qui tant suit la mer (DCCCXXII)

Autre Balade

                        Dyonides qui tant suit la mer
                        Et qui tant maulz fist par une galee,
                        Vous a induit a tel office amer,
                        Glaucons li dieux et l’amour Galatee.
5                      Tousjours seroiz sur le fait de l’armee
                        A Harefleur, Ogiles le galoiz,
                        Comme patron de bonne renommee :
                        Ce vous mande le bailly de Valoys.

                        Vous me deussiéz les instrumens nommer
10                    Qui gouvernent en tempeste formee :
                        Deux mas y a, voilles pour gouverner
                        Les antaynes, mainte rime aprestee
                        Pour naviguer, et si est a l’entr’e
                        Proe qui fent les undes, c’est ses droiz,
15                    Commutre y sont, qui font mainte siflee :
                        Ce vous mande le bailly de Valoiz.

                        Par eulx convient le timon ordener
                        A ponge, a ourse est la flette tournee,
                        Souventes foys fault gens d’armes bouter
20                    Pour le tourment, [en] soulte empulantee.
                        Le patron est [sur] la pouppe honnoree.
                        Par fortune n’ose entrer nulle foiz.
                        Adieu, telz gens, faictes la retournee :
                        Ce vous mande le bailly de Valloys.