Balade 486 : Vous qui vouléz aler en Retheloiz (DCCCXXI)

Autre Balade

                        Vous qui vouléz aler en Retheloiz,
                        Droit a Rethest trouveréz proprement
                        Pluseurs debteurs qui font nouvelles loys.
                        Aux crediteurs dient communement
5                      Riens ne doivent, puisqu’il n’ont aisement,
                        On ne les puet contraindre de paier,
                        Et si nient la debte absolument
                        Pour la paye longuement delaier.

                        Ainsi le dit le bailly de Valoys,
10                    Auquel aucuns ont fait semblablement.
                        D’e[us] sauroit bien parler Jehan Houdois,
                        Si li plaisoit, car le tricotement
                        De Jehan, Henry et [tout] pareillement
                        Du Baberueil et du grant Chandelliéz
15                    Qui lui doivent, et si vont varient                                                      215a
                        Pour la paie longuement delayer,

                        Maiz qui plus est, il sont si grans bourgoys
                        Que l’autrui veulent despouller franchement[1],
                        Ne cure n’ont que on leur dye ançois[2]
20                    Et de payer n’ont nulle foiz talent.
                        D’eulx obligier sont toudiz reffusant,
                        A eulx convient cent foiz le jour plaidier,
                        Et en plaidant prennent un incidant
                        Pour la paie longuement delayer.

[1] Ms. franchement despouller

[2] Ms. toudiz