Balade 485 : A ma dame faiz supplicacion (DCCCXX)

Autre Balade

                        A ma dame faiz supplicacion
                        Qu’il li plaise moy tant faire d’onnour,
                        Qu’en sa nouvelle ediffication
                        Soye logiéz, pour oster le froideur,                                                   214d
5                      Le dur gesir, le dangier, la pueur
                        Des taverniers dont a li me complain,
                        L’aler de nuit qui trop me fait dolent.
                        Bon fait logier pres de son souverain.

                        Et mesmement en la froide saison,
10                    Que chascun a mieulx mestier de chaleur,
                        Fait a Pariz bon avoir tel maison
                        Et mengier prés toudiz de son seigneur.
                        Gesir longuet pour eschever labour.
                        La se garde on et de froit et de fain,
15                    Compter, paier n’y fault [pas] par rigour :
                        Bon fait logier pres de son souverain.

                        Ancor y a une bonne raison.
                        Car qui gens a on puet parler a leur,
                        Se logiéz sont en l’abitacion,
20                    Et les avoir tousjours en sa clameur,
                        Maiz s’ilz sont loings logiéz c’est grant foleur,
                        Et les quiert on souventefoys en vain.
                        Et pour ce di et tien pour le meilleur :
                        Bon fait logier pres de son souverain.