Balade 484 : Gentilz doyens, a tout vos buthariaux (DCCXIX)

Balade

                        Gentilz doyens, a tout vos buthariaux
                        Et vos poissons de mer de Normandie,
                        Maistre Mahius et vous estes de tiaux
                        Qui frequantéz franque mare et boulie,
5                      Cidres verneux qui le ventre amolie
                        Et qui vous fait en France souhaidier.
                        Bien y pourréz prendre la pidimie :
                        Je pry a Dieu qu’il vous en veille aidier.

                        Gardéz vous bien de mangier maqueriaux
10                    Et ces mullés, c’est viande pourrie
                        Dont pluseurs gens sont devenus meseaux :
                        Si plaist a Dieux, vous deux n’i faudréz mie.
                        Car puisque vin n’avéz en vo baillie,
                        Vous ne pouéz fressermes redrecer,
15                    Maiz par de la vous fault laissier la vie :
                        Je pry a Dieu qu’il vous en veulle aidier.

                        Si Montargis fait trop mieulx ses aviaux,
                        Maquille aussy, Jehan, Henry ne s’oublie.
                        Car a Paris fournissent leurs musiaux
20                    De cras loppins et de bon vin sur lye.
                        La ne prennent nulle merencolie
                        Fors tout deduis avec le tresorier.
                        Pendus soient, se n’est pas flaterie :
                        Je prie a Dieu qu’il vous en veulle aidier.