Balade 483 : Benoiste soit la chambre aux chevalliers (DCCCXVIII)

Balade

                        Benoiste soit la chambre aux chevalliers
                        Qu’a fait faire ma dame d’Orliens
                        Qui ont payé avec les escuiers
                        Leur bienvenue en l’ostel de liens.
5                      A ce drecer nous ont fait moult de biens,
                        Dont quant a moy forment les en mercie.
                        Non pas autel feray, se je les tiens
                        En mon logis, dessus la chambre aisie.

                        Il ont servi de gremache[1] aux premiers,
10                    De bon cyvé avec les poiz bayens.
                        De quatre ros nous fu fait li mengiers,
                        Et de bon vin a esté leur moyens :
                        Maistre Ypocras, li bons fusiciens[2],
                        Vint au derrain, a l’oblee rostie.
15                    De tous ces mes certes n’aront il riens
                        En mon logis, dessus la chambre aisie.

                        Maiz il aront service de mestiers,
                        Ou chascun va [pour] mettre sont fiens.                                           214e
                        La ne sera pa li boires trop chiers :
20                    C’est pour Mahieu dont je sui confiens.
                        De graiz aront asséz et d’autre riens,
                        Boire chascun pourront[3] jusqu’a la lye.
                        Mengussent tout, pour moy riens ne retiens
                        En mon logis, dessus la chambre aisie.

[1] Ms. gremaches

[2] Saint Hilaire corrige en fisiciens

[3] Ms. y pourront