Balade 481 : Excellant prince, a Jaquemin de Mende (DCCXVI)

Balade

                        Excellant prince, a Jaquemin de Mende
                        Fait Eustace devant vous demander
                        Un bon camail dont il lui fait demande,
                        Qu’il lui promist. Or veulléz demander,
5                                  S’il le confesse a devoir,
                        Qu’il le paie, si fera son devoir.
                        Et s’il le nie, Eustace prouvera :
                        Pou vault promesse qui ne l’acomplira.

                        Et s’il est telz que de ce se deffende
10                    Et qu’il faille sur ce procés fonder,
                        Pour les despens conclurra qu’il les rende
                        Et que tenus il soit a le amender.
                                    Car pour le camail avoir
                        Yra vers vous, ce vous fait assavoir,
15                    Ledit Eustace, qui toudiz maintendra :
                        Pou vault promesse qui ne l’accomplira.

                        Ledit Eustace a vous se recommande,
                        Redoubtéz sires : vous le devéz garder,
                        Car cuer et corps est a vostre commande,
20                    Com vo subget, tout li pouéz mander.
                                    Pour faire vostre vouloir
                        Est tousjours prest de corps et de pouoir.
                        Maiz se payéz n’est, en tous lieux dira :
                        Pou vault promesse qui ne l’acomplira.