Balade 480 : L’autrier, pensiz et merencolieux (DCCCXV)

Autre Balade

                        L’autrier, pensiz et merencolieux,
                        Alay jouer a la place amoureuse :
                        Si regarday en un lieu tenebreux
                        Dedui jouant a dame paoureuse,
5                                  Pour ce que pres fu Delit,
                        Qui en passant la place les seurvit
                        Avec Paour, qui leur est alé dire :
                        Delivréz vous, car le temps le desire.

                        Maiz pour ce dire qui tant estoit doubteux,
10                    Ne pot Deduit laissier la gracieuse,
                        Ainçoiz toudiz, comme vrays amoureux,
                        La poursivoit en la vie joyeuse,
                                    Tant que Paour qui bien vit
                        Qu’oy n’ont pas ce qu’il leur avoit dit
15                    Leur escria : ― Se vous doubtéz mesdire,
                        Delivréz vous, car li temps le desire.

                        Et lors Deduit qui un pou fu honteux,
                        Quant il perçut que la chose yert doubteuse
                        Pour mesdisans qui tant son envieux,
20                    Fina ses jeux de la dame piteuse                                                       214a
                                    Qui de paour toute frit,
                        Jusques ad ce que d’elle congié prit.
                        Elle respont : ― Aléz a Dieu, beau sire.
                        Delivréz vous, car li temps le desire.